Qeveria dhe Politika

Greqia (Ελλάδα, Hellada ose Hellas), zyrtarisht Republika Helene (Ελληνική Δημοκρατία, Elliniki Dimokratia) është një Republikë Parlamentare. Presidenti, i zgjedhur nga Parlamenti çdo pesë vjet, është Kreu i Shtetit. Kryeministri është Kreu i Qeverisë. Këshilli i Ministrave, i përbërë prej kryeministrit, ministrave, zëvendës ministrave dhe ministrave pa portofol, është organi i vendimmarrjes kolektive që përbën Qeverinë e Greqisë.

Pushteti legjislativ ushtrohet nga Parlamenti dhe Presidenti i Republikës. Pushteti ekzekutiv ushtrohet nga Presindenti i Republikës dhe qeveria. Pushteti juridik i është dhënë gjykatave të drejtësisë, vendimet e të cilave ekzekutohen në emër të popullit.

Megjithëse Presidenti i Republikës ka pushtet politik të kufizuar, pasi shumica e pushtetit i takon qeverisë, detyrimet e tij përmbajnë emërimin formal të kryeministrit në rekomandimin e të cilit ai emëron ose shkarkon gjithashtu anëtarë të tjerë të qeverisë, përfaqësimin e shtetit në marrëdhëniet e tij me shtetet e tjera, shpalljen e referendumit etj.

Zgjedhjet e përgjithsme mbahen çdo katër vjet vetëm nëse Parlamenti nuk është shpërndarë më herët. Elektorati përbëhet prej të gjithë qytetarëve grekë të cilet janë mbi moshën 18 vjeç. Çdo qeveri e re, pas zgjedhjeve të përgjithshme ose pas dorëheqjes së qeverisë së mëparshme, duhet të paraqitet në Parlament dhe të kërkojë votëbesim.